2017年11月17日
早上11點半到達醫院，換上手術袍後先比姑娘打一枝黃體油針，然後入手術室等醫生，12點開始放胎，因為之前已經飲定大量水，醫生嚟到照過膀胱漲哂話啱啱好！可以睇得子宮好清楚，所以馬上可以開始放胎了！過程大約十幾分鐘，完全無感覺，唔痛，手勢非常好！完成後我只瞓咗大約15分鐘頂唔順要起身去廁所小便，實在太急，去完之後再返房，又比姑娘再打一枝HCG針，勁痛！之後瞓多45分鐘就飛的回家！返到屋企又馬上瞓上床，因為醫生叫我頭三日唔好出街，唔一定全日瞓，可以屋企行下，但慢慢行，同埋要用熱水浸腳。
之後兩日都好似十年未瞓過覺，無時無刻都咁攰！日夜話瞓就瞓
2017年11月20日（植入後第三天)
早上去醫院打油針，下午發現護墊有一點仔粉紅色分泌，好不安，不停上網search......
2017年11月21日 (植入後第四天)
護墊明顯多了幾滴粉紅分泌
2017年11月22日 (植入後第五天)
分泌開始變深了些少，類似肉色，量亦多了幾滴
2017年11月23日 (植入後第六天）
又要去醫院打油針，分泌又再深少少，量再多少少，似淺啡色，極度不安，忍唔住驗紅綠D，紅D深色，綠D淺線，唔知係咪放胎當日打咗HCG 5000iu嘅殘留.....
預打定輸數，所以去醫院期間行路極快，落樓梯又快，因為完全唔覺得子宮唔舒服，完全冇感覺！
2017年11月24日 (植入後第7天）
分泌深色好多！係暗紅色！量少過5蚊銀，再驗紅綠D，同之前差唔多色，懷疑仲係殘留
2017年11月25日（植入後第8天）
今次真係恐怖，一起床feel到流緊分泌，入廁所一睇......嘩！鮮紅色血！Omg!嚇死我啦！個心驚到爆炸！又即刻驗紅綠D！好似比之前深色咗少少，咁即係點？殘留應該唔會變深，只會變淺，忍唔住打比姑娘傾計，佢都估我多數失敗，不過叫我試下瞓床盡量唔好落地，姑娘話果枝針8日就會完全代謝，咁我覺得可能之前驗果D都唔準，之後果幾日再繼續驗下應該準D。夜晚繼續流咗一大篤暗紅色分泌！十足M到一樣！灰哂，已經打定輸數......
2017年11月26日 （植入後第九天）
起身如常地流分泌，已經乜都唔驚，預咗紅色之類，點知一睇.......@@全透明！又玩咩呢？今次驗綠D算！吓？？居然又深色過之前少少！唔通今朝篤尿濃D？原本連針都唔想去打，突然有返少少動力繼續撐落去，有返心情去醫院打油針了！而且行路又慢D，又小心D。
2017年11月27日 （植入後第十天)
如常地好多分泌，但個心定哂，全日分泌都係透明，下午又忍唔住想偷驗，但開始唔夠膽！但最後忍唔住好緊張咁驗枝紅D，今次更加深色！極度強陽！有種想開心又唔敢嘅感覺，驚食炸糊！都係睇定D！
ps: 由放胎後到第十天，每次食飽後有嚴重腹漲，但朝早瞓醒又冇事。
2017年11月28日 （植入後第十一天）
朝早8點幾起身小便發現護墊又有粉紅色分泌！唉！嚇少我一陣得唔得？！不安情緒又再返嚟！然後個心跳得好快，又馬上心驚膽跳咁用紅綠D驗下，初時未變色嘅時候，個心打定輸數，但塞完藥洗完手再望一望，已經有條好明顯嘅線出現咗，比之前幾日深色好多！想點？又流粉紅又有印.....天呀！唔好再嚇我啦~今日決定全日瞓床希望好D啦～
可能我真係唔可以行太多路，尋日出咗去飲茶之後再去街市買餸然後返屋企洗野打邊爐之後又再洗碗，都幾粗勞～
2017年11月29日 (植入後第十二天）
起身有分泌而且仲浫係深啡紅！量多，仲每隔幾小時流一次，全日共流了三次，嚴重不安，繼續用綠D驗孕，深色左！更加不安！打電話搵姑娘求救，姑娘幫我問醫生，決定提早去抽血驗孕，到夜晚分泌又轉淺，再夜少少已經又正常。
2017年11月30日 （植入後第十三天）
29號晚已經出去抽血，今日係睇報告，約咗醫生上午九點，我同老公凖時到，好心急，今日血壓上升！有109，我平時只有98，不過每次懷孕我血壓都係咁，所以量完血壓之後突然有少少信心，應該得咗！然後等待期間心跳加速......到我！即刻衝入房！醫生笑笑口話得啊！指數都高呀！HCG係2506，我即刻同醫生講：但係我成日流好多隻色嘅分泌啵！又紅又粉又啡又暗紅，然後醫生話唔怕，打密D油針啦，你要多D瞓床，不過又唔係叫你完全唔好落床，都要間唔中行下，最好盡量留喺屋企唔好出街了，繼續浸腳。
之後即刻幫我打咗一枝油針！我一直到下午五點幾暫時分泌全透明，感覺心定好多了！9日後覆診。
代續......
留言列表
植入胚胎 (1)
